Üsi Story

Das isch z Jahr wo aues hett agfange. Spontan zäme uf Nerja i d Ferie mit Fründe isch z Motto xi. Dr Phil wo süsch nid so spontan isch hett am Chrigu zuegseit mit z ga i d Ferie. Wis dr Zuefall (oder Chrigus planig?) so hett wöue isch d Michelle ou mitcho. Vo derä Wuche dörfe mir us rächtleche Gründ nid z viu verzeue, es hett sich aber glohnt uf das Spanie z reise...

D Michelle hett scho ändi 17 di schöni Schwiz verla, richtig Neuseeland für chli ga z plöischle. (Auso Teil vom Studium). Dr Phil hett aber gfunge 9 Wuche si z läng und isch nacheme knappe Monet nachegreist und d Michelle ga bsueche. Dert heisi zwöi schöni Wuche verbracht und ganz viu Erinnerige gsammlet wo no hüt nachehalle. Leider hett dr Phil ja o widr müesse ga schaffe, isch auso zrügg greist und hett d Michelle schweren Herzens für 1,5 Mönet in Neuseeland müesse zrügg la.

Zwöi jahr nachdem sech di zwöi hei verliebt, si si ir gliche Truppe nomau is gliche Hüsli in Spanie greist. Aui hei z Gfüeu gha, so guet wi denn chas doch gar nid wärde, aber es isch genau so guet, we nid sogar no besser worde. Da d Michelle ja immer no i ihrem Studium isch xi, hetts wider mau e Uslandufenthalt brucht (us Studietechnische Gründ natürlech) und so isch d Michelle im Herbst für 3 Mönet uf Schottland ga studiere. Dr Phil hetts o denn widr nid chönne la si und isch au Monet einisch uf Schottland greist für d Michell ga z bsueche. Slandet hett ungerdessä güebt fürnes Überraschigskonzärt im Planetspade Bern aber di gröschti Überraschig isch xi, dass d Michelle e Flug hett buechet um das Einmalige Konzert nid z verpasse. Da dr Phil ou no gad 30gi isch worde hettr das natürlech wöue fiire und so isch d Familie Krieg mit uf Schottland greist u hett uf dr Isle of Skye am Phil si Geburtstag gfiiret. Mit heigno heisi es Mami miteme brochne Arm, aber das isch e Gschicht wome ja de ar Hochzyt cha verzeue :)

Z 2020 hett agfange mit dr Planig vom Umzug uf Mötschwil. Es öppe 5 Seelä dörfli mit 6 Burehüser und 200 Chüe. Eigentlich e ganz e schöni Wonig, aber di möggende Chüe und dr bäuend Bobeli (wo natürlche niemerem öppis würd mache lutem Adolf und dr Alice (wo dr Hof  ghört), hei am Phil chli z schaffe gmacht. (speter meh derzue). När isch meh oder weniger währendem Umzug no Corona cho und niemer hett so rächt gwüsst: "Dörfemer itz überhoupt zügle?"

Trotz au däm hett dr Umzug wunderbar klappet und d Karantäne isch sehr e gueti Zyt xi. Di Zwöi Studis (Chrigu und Michelle) hei scho gäge Mittag afa 24erli Superbock lääre und dr Phil hett i sim Homeoffice zwüschedüre müesse d Tüüre zue tue, damit d dapgroup Chunde nid gad jede Seich ghöre wesi mitem Phil am Telefon si xi. Es Sponsoring vo Superbock wär  i dere Wuche nach 3 24ger Karton eigentlich dinnegläge.

Wi im 20gi erwähnt hett dr Phil meh oder weniger fasch es Jahr nid chönne schlafe. Z Hofläbe isch auso nüt xi für üse Bürolist.. D Michelle hetts gschafft dr Phil z locke, so daser i d Heimat vor Michelle hett wöue zieh.

Mit sehr viu Glück hei di zwöi zerscht mau zäme e Wohnig gfunge ar Bernstrasse in Burtlef. E witere grosse Schritt ir Beziehig: Zäme wohne! Mitere riise Vorfreud si di zwöi im Früelig uf Burgdorf züglet und heisechs der t gmüetlich igrichtet. Di bägende Chüe und dr bäuend Hund isch zum Glück nümme widr uftoucht, u so het o dr Phil widr mau chönne schlafe. Dr Phil hett Platz gfunge für Sini Outos und d Michelle hett es eigets Zimmerli übercho für ihri Hobbys. Im Summer sisi widr idr Nerja Truppe uf Korsika ga Gämpe, Im Herbst uf Zermatt ga wanderä und Ändi Jahr heisi bimne Familiäre Beerpong entdeckt, dass d Susanne rächt guet isch.

Es isch Herbst xi wo d Michelle e Kreativ Wuche ir Toscana hett gmacht und dr Phil sich hett xeit: I mache doch ou grad e Wuche für mi und ga chli ga fötele is Cinque Terre und i dr Toscana. Zäme si si abegfahre und dr Phil hett d Michelle am Zielort ufnes wunderschöns Wiiguet bracht. Scho denn hettr gwüsst: Wenr i dere Wuche e Ring fingt, de fragt er d Michelle ob si Gäng wett mit Ihm zäme si. Gesagt getan, nachere schöne Wuche wo beidi ihri Hobbys hei chönne usläbe, heisi di zwöit Wuche zäme verbracht. Amne aabe hett dr Phil unbedingt wöue no es Shooting mache im Sunneuntergang mit Stativ (so wimes haut macht?) Bi dere Glägeheit hett är e RIIISE Ringbox müesse i de Hose verstecke, d Michelle hett müesse ufere Wise d Ouge zue tue wiu dr Phil no e "Fotoidee" hett gha wonr süsch aube o macht, isch sider uf d Chnöi und wo d Michelle d Ouge widr ufgmacht hett glitzeret ihre e Saphir und Diamante entgäge mitem "Satz" Wetsch?

"Ja sicher!"

7 Mau. So Mängisch chame aus Lehrerin pro Jahr! auso i d Ferie reise. U das isch ou grad eine vo de wichtigschte Pfiler lut Phil und Michelle für ihri Beziehig. Enang Freiheite la, enang la mache und ou nid wärtend si we öpper mau gad öppis für sich wett mache anstatt zäme. I däm Jahr isch voraum d Planig vor Hochzyt im Fokus gstange. U bis itz (Januar 24) isch no nid ganz aus gfixet, aber scho mau e grosse Teil organisiert. Im Herbst hei sich di zwöi e Wuche Hotelferie gönnt in Spanie. Zwe Wuche lang nüt mache ufm Bett Snacks ässe, Serie luege, Male u Podcasts lose. Ganz nachem Gschmack vom Phil. D Michell isch mau einisch nid ganz uf Ihri Chöschte cho u s nächscht mau isch äuä de z Hotel eher chli weniger wichtig u derfür Zäutle u chli meh Aktivität. Aber so chame ja ou nach 6.5 Jahr Beziehig no öppis vonang lehrä.

Im 2024gi steit d Hochzyt a. Es git no einiges ztüe aber d Michelle u dr Phil fröie sich risig uf dä Tag mit euch aune! Wär bis hie hett möge läse isch würklech a dr Gschicht vo dene zwöi intressiert. Faus no nid gmacht: Unbedingt amäude. de wärdet dir de ou verpflegt!